ہمارے گھرانوں میں زیادہ تر مکھن پر گھی کو ترجیح دی جاتی ہے اور اسے مکھن کا صحت بخش متبادل سمجھا جاتا ہے۔ گھی دراصل مکھن ہی کی زیادہ شفاف قسم ہوتی ہے اور کیونکہ دونوں ایک ہی قسم کے دودھ سے حاصل کیے جاتے ہیں اس لیے ان کی غذائی تشکیل اور چکنائی کی مقدار لگ بھگ برابر ہی ہوتی ہے۔
کھانوں میں استعمال پر دونوں کی تاثیر بھی تقریباً ایک جیسی ہی ہے اور غذائیت بھی۔ لیکن کچھ لحاظ سے یہ دونوں مختلف مصنوعات ہیں۔ آئیے ان دونوں میں فرق جانتے ہیں:
1۔ جب کھانوں میں استعمال کی بات آتی ہے تو گھی کو کئی پکوان بنانے میں استعمال کیا جاتا ہے جیسا کہ دال اور سالن وغیرہ میں۔ بسا اوقات اسے حلوے جیسے میٹھے بنانے میں بھی استعمال کیا جاتا ہے جبکہ مکھن کا استعمال نسبتاً محدود ہے، کم از کم گھی کے مقابلے میں۔
2۔ دونوں مصنوعات کو محفوظ کرنے کے طریقے الگ ہیں۔ گھی دو سے تین ماہ تک عام درجہ حرارت پر محفوظ کیا جا سکتا ہے جبکہ مکھن کو ریفریجریٹر میں رکھنا پڑتا ہے اور اسے بٹر پیپر میں لپیٹ کر رکھنا چاہیے۔
3۔ گھی میں مکھن کے مقابلے میں چکنائی کی مقدار زیادہ ہوتی ہے۔ یہ 60 فیصد سیر شدہ چکنائی (saturated fats) رکھتا ہے اور فی 100 گرامز 900 کلو کیلوریز فراہم کرتا ہے۔ دوسری جانب 100 گرام مکھن میں 3 گرام غیر سید شدہ چکنائی، 51 فیصد سیر شدہ چکنائی اور 717 کلو کیلوریز ہوتے ہیں۔
4۔ گھی میں دودھ کے لحمیات (پروٹینز) کی مقدار مکھن کے مقابلے میں کم ہوتی ہے۔ یہ ملک شوگر لیکٹوس سے پاک ہوتا ہے۔ مکھن میں ملک شوگر لیکٹوس اور ملک پروٹین casein دونوں ہوتے ہیں۔
آخری بات
گھی اور مکھن دونوں یکساں قدرتی اجزاء اور چکنائی رکھتے ہیں۔ لیکن کیونکہ گھی ملک شوگر لیکٹوس اور ملک پروٹین casein سے پاک ہوتا ہے، اس لیے لیکٹوس اور casein سے الرجی رکھنے والوں کے لیے زیادہ بہتر ہے۔
